Misaka sa 5.4 porsiyento ang unemployment rate sa Pilipinas niadtong bulan sa Setyembre ning tuiga, gikan sa 5.3 porsiyento niadtong Agosto, nga nagdala sa gidaghanon sa mga Pilipinong walay trabaho ngadto sa 2.86 milyon gikan sa 2.77 milyon sa miaging bulan, sumala sa Philippine Statistics Authority (PSA).
Sa mga sektor sa trabaho, ang konstruksyon ang nakarekord sa pinakadakong pagkunhod sa gidaghanon sa mga empleyado, nga mikabat sa 416,000 ug gisundan kini sa agrikultura ug forestry nga mikunhod og 269,000.
Bisan pa sa pagsaka sa unemployment rate, miuswag gihapon ngadto sa 50.32 milyon ang gidaghanon sa mga Pilipinong adunay trabaho, gikan sa 49.79 milyon niadtong Agosto, o katugbang sa pagdugang og 534,000 ka mga empleyado.
Sa laing bahin, mikunhod ngadto sa 11 porsiyento ang underemployment rate niadtong Setyembre, gikan sa 11.9 porsiyento sa miaging bulan, samtang mikabat sa 5.56 milyon ang mga nagtrabaho nga nangandoy og dugang oras sa trabaho, dugang nga trabaho o trabaho nga adunay mas taas nga oras sa pagpanarbaho. (raniel mahunyag)
