Namatay ang dili momenos sa pito ka tawo ug naangol ang lain pang 112 ka indibidwal human mabangga sa usa ka tren ang luyo sa laing tren sa distrito sa Al-Ayyat, lalawigan sa Giza, mga 76 kilometros sa habagatan sa Cairo, Ehipto, niadtong Domingo.
Sumala sa Egyptian Railway Authority, ang tren nga nagbiyahe gikan sa Giza padulong sa Fayoum kay mibangga sa luyo sa tren nga nagbiyahe gikan sa Cairo padulong sa Aswan, hinungdan nga nadiskaril ang pipila ka bagon.
Gipakatap sa mga otoridad ang mga rescue team ug crane aron hawanan ang nahibiling kaguba ug mapasig-uli ang serbisyo sa tren sa linya sa Cairo-Upper Egypt, apan wala pa magtakda og panahon alang sa hingpit nga pagbalik sa operasyon.
Samtang, gimando ni Presidente Abdel Fattah al-Sisi ang dinaliang imbestigasyon sa maong aksidente ug gipasiugda nga paninglon sa ilang tulubagon ang bisan kinsang mapamatud-ang nagpasagad. (raniel mahunyag)
