Gibutyag ni U.S. President Donald Trump nga gisusi na sa Federal Bureau of Investigation (FBI) ang posibleng kalambigitan ni Nvidia Chief Executive Officer (CEO) Jensen Huang sa usa ka babayeng negosyante nga gituohang espiya sa China.
Matud ni Trump, nakig-istorya siya kang Huang niadtong Lunes ug gipanghimakak sa CEO nga wala siya mahibalo nga ang maong babaye, si Alice Huang, kay giingong naghatod og impormasyon ngadto sa Beijing.
Tungod sa migawas nga mga taho bahin sa gituohang operasyon sa paniktik, mikunhod og 4.3 porsiyento ang presyo sa mga share sa Nvidia ug misira kini sa $178.67 matag share niini, samtang nagpadayon ang pagsusi sa board sa kompanya aron mahibaloan kung target ba si Huang sa usa ka langyaw nga operasyon sa paniktik.
Hugot nga gisalikway sa Ministry of Foreign Affairs sa China ang mga alegasyon sa pagpang-espiya ug gihulagway kini nga walay basihan ug bahin lamang sa kampanya sa pagdaot sa ilang nasud.
Dugtong niini, gikatakdang motambong si Huang sa usa ka pribadong briefing sa mga lider sa mga komite sa U.S. House of Representatives sa Nobyembre 18 aron motubag sa mga pangutana bahin sa maong isyu ug sa mga lakang sa seguridad sa iyang kompanya. (raniel mahunyag)
