Gipamugos ni Lead Counsel Atty. Sheila Sison niadtong Martes, Nobyembre 10, 2026, nga ang kabtangan nga nakadeklara sa Statement of Assets, Liabilities, and Net Worth (SALN) ni Vice President Sara Duterte kay nagpunting sa eksaktong susamang kabtangan nga gipresenta sa depensa, sunod kini sa ilang pagsupak sa alegasyon sa prosekusyon nga managlahi kining mga kabtangan.
Matud ni Sison, kung gatuo ang prosekusyon nga dunay bulag o uban pang kabtangan nga wala madeklara ang Bise Presidente kay sayon ra unta alang kanila ang pagpresenta og dugang nga mga dokumento sama sa bulag nga tax declaration, deed of absolute sale, o registration documents aron mapamatud-an ang ilang punto sa Senate impeachment court.
Gihatagan usab og gibug-aton sa abogado sa depensa nga human na sa pagpresenta ug pormal nga pagpasaka og ebidensya ang kampo sa prosekusyon, diin nagpagawas na og desisyon ang hukmanan bahin niini niadtong Nobyembre 5.
Gitawag usab ni Sison nga usa ka matang sa “hair-splitting” o pagpadako lamang sa gagmayng butang ang argumento sa prosekusyon tungod kay tin-aw na nga ang kabtangang gitino sa duha ka testigo sa depensa kay nitukma sa pormal nga gideklara ni Duterte sa iyang SALN.
Dugtong niini, gipadayag usab sa depensa nga ang tanang gapaminaw ug gasunod sa kaso kay nakabalo na usa lamang ka kabtangan ang gihisgutan ug kung nakasiguro ang prosekusyon nga dunay lain pang kabtangan, angay nga nagsumite sila og mga tukmang dokumento isip pagpamatuod ayha nagsira ang ilang formal offer of evidence. (raniel mahunyag)
