Gipahibalo sa Samahang Basketbol ng Pilipinas (SBP) ang katapusang 12-man roster sa Gilas Pilipinas alang sa fifth window sa 2027 FIBA Basketball World Cup Asian Qualifiers, diin nalakip si Bennie Boatwright ug Rhenz Abando.
Gilaoman nga mohimo sa iyang debut alang sa nasudnong koponan si Boatwright isip puli kang Justin Brownlee, nga padayong dili makaapil tungod sa mga problema sa panglawas, samtang mibalik usab sa koponan si Abando human sa iyang katapusang pagdula alang sa Pilipinas sa 2023 FIBA Basketball World Cup.
Kauban nila sa roster si Kai Sotto, Dwight Ramos ug AJ Edu nga ubos sa pagpangulo ni head coach Tim Cone.
Ikalima sa Group E ang Pilipinas nga adunay 4-4 nga win-loss record ug makigsangka sa Syria sa Nobyembre 27 ug Iran sa Nobyembre 29 sa Karisma Arena sa Seremban, Malaysia, diin gikinahanglan nilang makadaog aron mapalig-on ang ilang kampanya nga makasulod sa 2027 FIBA World Cup. (raniel mahunyag)
