Patay ang dili moubos sa pito ka Palestinian, lakip ang usa ka amahan ug ang iyang 13-anyos nga anak nga lalaki, sa mga pag-atake sa militar sa Israel sa Gaza Strip, sumala sa mga opisyal sa panglawas sa maong teritoryo.
Namatay sila Fadi Rajab ug ang iyang anak nga si Abubakr human maigo sa usa ka airstrike ang atop sa pasilongan sa mga Palestinong napugos sa pagbiya sa ilang mga pinuy-anan sa kasilinganan sa Zeitoun sa Gaza City, usa pa ang namatay sa airstrike duol sa usa ka tunghaan sa Daraj, usa sa pagpamusil sa Khan Younis, ug tulo sa laing airstrike sa usa ka pabrika sa metal sa Sabra.
Gipahayag sa militar sa Israel nga gitumong sa ilang mga pag-atake ang mga militante sa Zeitoun ug Daraj, apan wala kini dayong mikomento bahin sa mga insidente sa Khan Younis ug Sabra.
Nagpadayon ang pagkabungkag sa mga negosasyon bahin sa pagdis-arma sa Hamas ug pag-atras sa mga sundalo sa Israel ubos sa gikasabutang ceasefire nga gipasiugdahan sa Estados Unidos, diin dili moubos 1,600 na ka Palestinian ang napatay sukad kini gipatuman niadtong miaging tuig, samtang milapas na sa 74,000 ang kinatibuk-ang ihap sa namatay sukad nagsugod ang gubat niadtong Oktubre 2023. (raniel mahunyag)
