Gipamalandongan sa aktres ug TV host nga si Kris Aquino ang iyang lima ka tuig nga pakigbisog batok sa daghang sakit nga autoimmune, diin mipasalig siya sa iyang mga tigsuporta nga padayon siyang nakigbisog ug naglaum nga maabot sa remission ang pipila sa iyang grabeng mga sakit.
Sa iyang bag-ong pahayag, gibutyag ni Aquino nga ipaayo nila ang mga banyo sa ilang panimalay sulod sa Cojuangco family compound sa Tarlac aron mahimong angay ug mas luwas alang sa mga tawong adunay kakulangan o persons with disabilities (PWD), human siya makasinati og pipila ka aksidente tungod sa pagkawala sa balanse.
Matud ni Aquino, hilabihan ang kasakit nga iyang mabati sa matag lakang panahon sa pag-atake sa rheumatoid arthritis ug vasculitis, hinungdan nga kanunay siyang nagkinahanglan sa tabang sa usa o duha ka nurse ug sa iyang kamanghuran nga anak nga si Bimby sa iyang inadlaw nga mga kalihokan.
Wala siya maghatag og bag-ong detalye bahin sa iyang kahimtang sa panglawas, apan gipasiugda niya nga usa sa mga leksiyon nga iyang nakat-onan sa dugay niyang pakigbisog mao nga dili ikaulaw ang paghilak ug pagpakita sa kahuyang, diin mipahayag usab siya sa iyang hingpit nga pagsalig sa iyang medical team, pamilya, suod nga mga higala ug pag-ampo. (raniel mahunyag)
