Gidepensahan ni Philippine National Police (PNP) Public Information Office Chief PBGen. Allen Rae Co ang mga pagpangdakop nga gihimo sa kapulisan atol sa mga protesta sa 49th ASEAN Summit, human adunay mga alegasyon nga gidakop ang pipila ka demonstrador nga walay igong hinungdan.
Matud ni Co, dili mangdakop ang kapulisan kung walay nahitabong paglapas sa balaod ug gituman lamang nila ang ilang katungdanan sa pagpatuman niini.
Gipasiugda usab niya nga ang tanang aksiyon sa kapulisan kinahanglan subay sa balaod ug sa gitakdang mga pamaagi sa pagpatuman niini.
Dugtong niini, mitaho ang PNP nga mokabat sa 220 ka indibidwal ang gidakop atol sa mga protesta, samtang 21 ka menor de edad ang giluwas sa mga otoridad. (raniel mahunyag)




