Gidayeg ni UN Secretary-General Guterres ang malampusong BARMM Parliamentary Elections, usa ka dakong lakang sa kalinaw sa rehiyon. Basaha ang iyang mensahe.

Gidayeg ni United Nations Secretary-General António Guterres ang malampusong pagpahigayon sa unang parliamentary elections sa Bangsamoro Autonomous Region in Muslim Mindanao (BARMM), nga iyang gihulagway isip dakong lakang sa pagpalig-on sa proseso sa kalinaw sa rehiyon.

Matud ni Guterres, ang maong kalampusan kay angay nga mahimong ehemplo dili lamang sa Pilipinas kondili usab sa ubang nasud ug rehiyon.

Sa iyang pakigpulong atol sa ika-16 nga ASEAN-United Nations Summit niadtong Nobyembre 16, gipasiugda ni Guterres ang pagpalig-on sa kooperasyon tali sa ASEAN ug United Nations taliwala sa nagpadayong mga panagbangi, pagbag-o sa klima, nagkadakong panginahanglan sa makatawhanong tabang, ug pagsaka sa gasto sa panginabuhi ug enerhiya.

Gipunting usab niya ang nagpadayong krisis sa Myanmar ug nanawagan sa tanang partido nga panalipdan ang mga sibilyan, tahoron ang internasyonal nga balaod, ug tugotan ang luwas, makanunayon ug walay babag nga paghatod sa makatawhanong tabang ngadto sa mga nanginahanglan. (raniel mahunyag)