
Gikumpirma ni Presidente Ferdinand Marcos Jr. nga matud pa walay kasabutang pirmahan bahin sa US-led Pax Silica Initiative sa pagbisita ni US President Donald Trump dinhi sa nasud.
Matud ni Marcos, dili sakop sa pagbisita ni Trump dinhi sa Pilipinas ang pagpirma sa usa ka framework agreement alang sa maong inisyatiba.
Una nang gipahayag ni US Ambassador to the Philippines Lee Lipton nga walay pirmahang kasabutan ang Presidente sa Estados Unidos nga giuyonan usab ni Presidente Marcos.
Bisan pa niini, dili kini nagpasabot nga hingpit nang undangon ang maong sugyot nga kasabutan.
Mahinumdoman nga gibutyag ni Philippine Ambassador to the United States Jose Manuel Romualdez nga kinahanglan pang ayuhon sa duha ka nasud ang mga detalye sa maong kasabutan.
Dugtong niini, gipadayag usab ni Department of Trade and Industry Undersecretary Ceferino Rodolfo nga target pa gihapong mapirmahan ang legal framework sa Pax Silica sa dili pa matapos ning tuig sa 2026 aron mapalig-on ang supply chain alang sa importanteng teknolohiya sama sa semiconductors ug artificial intelligence. (raniel mahunyag)


.jpg)

