Nanawagan si Cagayan de Oro Chamber of Commerce and Industry Foundation President Engr. Almarico Brito ngadto sa gobyerno ug sa business sector nga magpahigayon dayon og dinaliang diyalogo aron batukan ang stagflation nga wala giwelcome sa komunidad sa negosyo.

Gipunting ni Brito nga delikado ang kasamtangang kahimtang sa ekonomiya diin nagpabiling hinay ang paglambo sa negosyo ug wala misaka ang sweldo sa mga trabahante samtang padayon ang pagsaka sa presyo sa mga palaliton.

Giklaro sa opisyal sa Oro Chamber nga dili kapilian sa sektor sa negosyo ang pagsurender ug nagpadala na ang Mindanao Chambers og position papers ngadto sa nasudnong organisasyon aron hangyuon ang mga economic managers nga mangita og solusyon. Gitataw ni Brito nga gikinahanglan ang dinaliang panaghiusa sa mga magbabalaod ug pribadong sektor sa dili pa matapos ang tuig aron dili na mograbe ang epekto niini sa ekonomiya.