Gipahinumdoman ni Cagayan de Oro City Councilor ug Committee on Police, Fire, and Public Safety Chairman Roger Abaday ang Task Force nga gitahasan sa pagpanakop sa mga saba nga motorsiklo nga magpadayon ug dili maghunong hunong sa operasyon.
Gibutyag ni Abaday nga daghang reklamo ang nadawat gikan sa Barangay Kauswagan, Barangay Gusa, ug uptown area ilabi na sa mga convenience store daplin sa highway diin nagtapok ang mga nagpabura bura nga motorista.
Gipasabot sa konsehal nga giapil na sa operasyon ang kapulisan, Roads and Traffic Administration, Land Transportation Office, ug mga opisyal sa barangay apan kinahanglan nga makanunayon ang kampanya ug dili batasanon ang estilo nga “now you see me, now you don’t”.
Gitataw ni Abaday nga ubos sa Republic Act 4136 ug lagda sa Department of Trade and Industry, supak sa balaod ang kasaba sa tambutso nga molapas sa 99 decibels.










