Nagpadayon ang pagpangita sa mga rescuer sa Indonesia sa 36 ka trabahante nga gikatahong nawala human sa sunog sa pabrika sa kendi sa Cikande, Serang Regency, lalawigan sa Banten, niadtong Sabado sa gabii, Nobyembre 21.
Mikabat sa tulo ka tawo ang namatay, samtang 15 ang nakaluwas, lakip ang upat nga naangol ug gidala sa duol nga ospital ug klinika alang sa pagtambal.
Gisusi sa mga rescue team ang naguba nga mga bahin sa pabrika diin gituohang posibleng na-trap ang ubang mga trabahante, samtang nagpadayon ang mga bombero sa pagpalong sa nahibiling kalayo ug pagpabugnaw sa mga dapit nga aduna pay mga baga.
Wala pa matino sa mga otoridad ang hinungdan sa maong sunog, nga miigo sa pabrika sa PT Fonusa Agung Mulia nga nagprodyus og mga kendi ug mga pagkaong tam-is. (raniel mahunyag)






