CAGAYAN DE ORO CITY – Gipanganti sa militar nga ilang bantayan ang mga kalihukan sa galamay sa napatay’ng si Owayda Marahomsar alyas Abu Dar.
Kini human miggawas ang report nga may bag-ong lider na ang grupong Dawla Islamiya sa Lanao del Sur pinaagi ni “Jakari”.
Si AFP Western Mindanao Command o WestMinCom spokesperson Lt Col Gerry Besana miingon nga ilang seguradohon nga wala na’y mabilin nga mga terorista nga sakop sa maong grupo aron dili na masubli pa ang nahitabo nga Marawi siege.
Una nang miggawas ang report nga anaa nalang sa 20 hangtud 25 ka mga miembro ang nabilin sa maong grupo.
Hisayran nga positibo ang resulta sa DNA test nga si Abu Dar ang napatay sa militar niadtong bulan sa Marso 2019.
Samtang kampante ang militar nga dili na madugangan pa ang ihap sa mga miyembro sa grupong Dawla Islamiya sa Lanao del Sur.
Sumala ni Besana nga mismo na ang mga residente sa mga kasikbit nga lugar ang nagdumot sa mga kalihukan sa terorista.
Gani, gihingusgan karon sa militar ang pagwagtang sa ideolohiyang terorismo sa pangutokan sa katawhan aron dili na moanib sa mga teroristang grupo.
Una nang gihagit sa security analysts ang militar nga angay masumpo ang violent extremism nga nagka-grabe sa Mindanao dala sa impluwensiya sa teroristang ISIS sa Middle East.
