CAGAYAN DE ORO CITY-Mihatag na’g ‘go signal’ ang pipila ka imam nga bombahan ang mga mosque nga gikotahan sa Maute-ISIS terrorists sa Marawi City.
Kini nunot na sa kamatayon sa duha ka sundalo tungod sa “close-quarter battles” batok sa mga nabilin nga terorista.
Matud ni Lanao del Sur 2nd District Board Member Abdulhamid Umpa Amerbitor nga bisan sakit sa ilang bu-ot apan wala na sila’y laing mahimo tungod kay mao lamang kini ang nabilin nga paagi aron mahurot ang mga kaaway ug mahuman ang giyera.
Samtang gisupak sa militar ang ‘go signal’ nga gihatag sa pipila ka imam nga bombahan ang mga mosque nga gikotahan sa Maute-ISIS terrorists sa Marawi City.
Gibutyag ni Joint Task Force Marawi deputy commander Col. Romeo Brawner nga makakuha’g dugang simpatiya sa mga sibilyan ang mga terorista kun ugaling bombahan nila ang mga mosque.
Mangita sila’g paagi nga mapukan ang mga terorista nga walay bombahan nga mga mosque.
Una nang gibutyag ni Pres Rodrigo Duterte nga wala niya hatagi’g timeline ang mga sundalo nga mahuman ang kagubot.
Maoy iyang gusto nga maluwas nga buhi ang hostages.
