CAGAYAN DE ORO CITY – Emosyonal ang pamilyang Pagaling sa requim mass alang sa ilang inahan nga nag-inusarang namatay sa ngilngig nga bangga sa duha ka Ford vehicles sa diversion road sa Brgy Barra,Opol,Misamis Oriental.
Kini human gisaysay sa magsoon si Malaybalay City Councilor Cecille Pagaling ug sa maestro nga si Julius Pagaling kon unsa ka ma-amumahon nga klase sa inahan ang biktima nga si Engr. Emilyn Pagaling ngadto sa pito niini ka anak.
Miingon si Konsehala Pagaling nga sobra kalisod mawad-an sa inahan nga maoy nagpadako kanila nga subay sa katarong ug pagka-mainampu-on.
Samtang gibutyag usab ni Julius nga kon makamao pa unta mosunod ang tanang anak sa pasidaan sa ginikanan,dili unta sila mawad-an sa ilang pinangga nga inahan.
Si Engr Pagaling ang gikan pa sa Amerika kuyog sa iyang bana nga igo lang gisugat sa ilang mga anak sa airport apan pag-abot sa Opol,nabanggaan ang ilang gisakyan sa laing sakyanan nga gimaneho sa 17 anyos nga suspek sa Nobyembre 20 sa kagabii.
Gilubong ang ilang inahan sa pribadong menteryo sa Malaybalay City kagahapong adlawa.
