Kinahanglan una muagi sa cross examination ang mga pahayag ni Ramil Madriaga aron masukod ang kredibilidad sa iyang gipangbato nga alegasyon batok kang Vice President Sara Duterte, sumala ni Atty. Edward Chico, usa ka political analyst.
Matod ni Atty. Chico, sa legal nga pamaagi dili dayon ikonsiderar nga lig‑on ang usa ka testimonya kon wala pa kini masuta pinaagi sa direct examination, cross examination ug pagkompara sa ubang ebidensya.
Dugang pa niya, sa kasamtangan evidentiary pa lamang ang kahimtang sa mga giingon ni Madriaga tungod kay wala pa kini naagian sa hugot nga pangutana gikan sa pikas nga bahin.
Giingon usab sa abogado nga kinahanglan tan‑awon kon tinuod, mapamatud‑an sa dokumento ug mosubay ba sa kasagarang kasinatian sa tawo ang mga alegasyon nga gilatag niini.
Busa iyang gipasiugda nga sayo pa aron moingon dayon nga tinuod o bakak ang tanan hangtod dili pa mahuman ang hustong proseso sa pagsusi.
