Gipadayag ni City Mayor Rolando Klarex Uy nga giplano sa lokal nga kagamhanan ang pagtukod sa bagong City College aron mas mapaduol sa katawhan ang serbisyo sa edukasyon.
Matod ni Mayor Uy sa iyang mensahe atol sa programa nga Kuyog Ta sa Serbisyo sa Baryo nga gipahigayon sa Barangay Carmen kagahapon, himuon ang maong eskwelahan sa dapit sa City Hall gawas sa executive building aron mahimong sentro sa pagtuon sa mga kabatan-onan.
Iyang giingon nga gilauman nila ang daghang magpa-enroll sa umaabot nga enrolment, busa andam ang syudad sa pagpangita og paagi aron masuportahan ang panginahanglan sa mga estudyante.
Lakip sa ilang gihunahuna ang pagpalit og school bus aron adunay masakyan ang mga estudyante padulong sa tunghaan sa Agusan.
Dugang pa niya, nangayo siya og bug-os nga suporta gikan sa City Council, ilabi na sa mga konsehal, aron mapadali ang pagpatuman sa proyekto.
Sumala ni Mayor Uy, walay makalabaw sa maayong edukasyon isip yawe sa mas maayong kaugmaon sa mga anak sa ordinaryong pamilya.
