Dakong sagpa sa soberanya sa Pilipinas ang giinsistir sa Amerika nga dili ipatuman ang lokal nga balaod sulod sa tukuron nga Pax Silica hub susama sa kanhi base militar sa Clark ug Subic.
Gibutyag ni kanhi Bayan Muna Representative ug Bagong Alyansang Makabayan leader Attorney Carlos Isagani Zarate nga gitago sa publiko ang tibuok kasabutan ug gipaagi lamang sa Department of Trade and Industry aron matabunan ang militar ug politikal nga katuyoan niini.
Gawas sa paglapas sa katungod sa nasud, pipila lamang ka manual labor ang makuha sa mga Pilipino tungod kay pulos na teknikal ug makinarya ang modumala sa operasyon sa maong pasilidad, pasabot ni Zarate.
Pasiatab lamang ang saad sa administrasyon nga makapalambo kini sa ekonomiya samtang nagpabiling kulelat ang Pilipinas sa rehiyon bisan pa sa kadugay na nga pagsalig sa dikta sa Estados Unidos.






