Mulusad na sa Batch no.2 sa “ayuda distribution” alang sa nahibiling 5% sa mga rela drivers nga wala mahatagi sa ilang fuel ug cash subsidy, gikan sa lokal nga kagamhanan ning syudad.
Mipasabot si City Information Officer Jade Adeser nga ubos sa hurisdiksyon sa CDO-LGU ang mga rela drivers busa dali ra ang pagpalista ug pagpagawas sa tag P2000 nga ayuda, dugang sa P5000 ayuda gikan sa Department of Social Welfare and Development (DSWD).
Gani, gahulat si City Mayor Rolando Klarex Uy sa limpyo nga listahan gikan sa Land Transportation Franchising and Regulartory Board (LTFRB)-X alang sa maayudahan nga mga driver sa taxi, modernized bus, tradisyonal jeep, motor taxi ug food delivery riders.
Miingon si Adeser nga gisaad sa mayor nga mapangitaan silag ayuda ilabe na nga dili ti-aw ang ilang kaagi dihang nagsaka ang preyso sa krudo sa halos P160 per litro ug nag-antos sa pletihan nga walay umento.
