Gisugdan na sa lokal nga kagamhanan ang hugot nga beripikasyon sa listahan sa mga “qualified” nga motorrela drivers sa dakbayan aron masiguro nga mapadangat ang saktong tabang ngadto kanila. Kini nga proseso gipahigayon sa City Hall Quadrangle ubos sa hugot nga seguridad sa kapulisan ug kasundalohan, tungod sa dakong kantidad sa salapi nga muabot sa minilyon ka pesos.
Giklaro sa mga otoridad nga kini nga ayuda “batch 1” pa lamang, ug duna pay mosunod nga serye sa tabang nga dili lang para sa mga rela driver, kondili alang usab sa uban pang mga drivers sa syudad.
Sa pagkakaron, hagit sa kagamhanan ang pag-finalize sa saktong listahan base sa gihimong mga interview aron masiguro nga walay angay nga drayber ang malaktawan.
Nanawagan ang lokal nga kagamhanan sa kooperasyon sa tanan samtang gipaningkamutan ang hapsay ug paspas nga pag-apod-apod niini nga ayuda. (jane mae abulag)
