CAGAYAN DE ORO CITY – Wala pa gihapon matarog ang baruganan sa bayaw’ng lalaki ni Pres Bongbong Marcos ang kasamtangang administrador sa Phividec nga si Atty.Joseph Donato Bernedo nga mosalom sa magubot nga kalibutan sa politika dinhi sa dakbayan.
Kini human wala undangi sa pagkuraw sa mga sakop sa media si Bernedo kon unsay iyang daganan sa syudad sa sunod tuig nga eleksyon.
Namahayag ang bana sa kamanghurang anak sa Marcoses nga si Aimee nga wala pa sila’y higayon sa paghisgot sa politika kay pokus niini ang trabaho nga gihatag kaniya sa Malakanyang kabahin sa Phividec.
Apan nagpasalamat usab kini nga nasampit sa partido Padayon Pilipino nga kabahin sa posibleng kuhaon aron ipalig-on ang ilang line-up batok sa alyansa nila ni City Mayor Rolando ‘Klarex’ Uy ug Cagayan de Oro 2nd District Cong. Rufus Rodriguez.
Una nang gibutyag ni Cong. Lordan Suan nga kinahanglan nila makig-alyansa sa partido Padayon Pilipino kay dagko nga pamilya ug lig-on nga puwersa si Klarex ug Rufus kon tinud-anay nga sila mag-uban sa 2025 elections.
Dako ang pagduda sa pipila ka political observers nga mosulod sa politika si Bernedo sanglit sunod-sunod ang mga aktibidad niini nga gi-abli sa publiko pinaagi sa pagtutok sa prensa.
Dumduman nang namalibad si Aimee nga mosulod sa politika gawas lang kon mismo ang ilang pamilya ang mokumbensir kaniya.
Si Aimee ang aktibong usa sa mga consultant ni Klarex isip pagtabang sa administrasyon ilabina sa aspeto sa programang edukasyon sa syudad.
