CAGAYAN DE ORO CITY – Gibasura sa korte ang kasong-sibil nga giduso sa naka-floating nga board of directors ug general manager sa Cagayan de Oro Water District o COWD batok sa pag-takeover sa Local Water Utilities Administration o LWUA pinaagi sa interim officials.
Kini human wala nakumbensir ang korte sa gi-presentar nga argumento sa panig nila ni COWD chairman of the board Nelia Lee,board of directors Gerry Caño,Janet Floirendo ug General Manager Engr. Antonio Young nga nag-kuwestiyon sa legalidad sa pagsulod sa LWUA sa syudad.
Kini ang rason nga naglugwa’g hukom si RTC Branch 38 Presiding Judge Emmanuel Pasal nga ibasura ang kasong-sibil rason nga walay nakuha nga temporary restraining order o TRO ang petitioners batok sa LWUA takeover.
Dugtong niini,gikalipay ni I-COWD General Manager Fermin Jarales ang paborabli nga hukom nga gilugwa sa korte kontra sa petisyon sa mga manumbong.
Siya miingon nga tungod sa pagdumili’g hatag sa TRO sa mga nanumbong,mas maka-pokus na kini sa tahas nga gisugo kanila ni Pres.Bongbong Marcos nga haw-ason sa grabeng suliran ang COWD.
Hisayrang mismo si Marcos ang nagtahas sa LWUA pagsulod kay nakaabot sa iyang atensyon nga nagkabangi sa utang ang COWD ug Metro Pacific Waters nga nagresulta sa temporaryong putol sa tubig-suplay ning syudad.
