CAGAYAN DE ORO CITY, Philippines – Nabati ni US President Donald Trump ang kayugot ni Ukraine’s President Volodymyr Zelenskyy batok kang Russian President Vladimir Putin.
Sa ilang pagtagbo sa Oval Office sa White House, gipasagdan ni Trump si Zelenskyy nga mupahungaw sa iyang gibati bahin sa ilang plano nga maundang na ang gubat batok sa Russia nga nagsugod niadtong Pebrero 22, 2022.
Inay paghusay, nabantayan ni Trump ang grabe nga pagdumot ni Zelenskyy tungod sa libo ka mga sibilyan nga gipatay sa mga sundalong Ruso.
Gawas kang Trump, namatikdan usab ni US Vice President JD Vance ang kagustuhan sa Kiev Government nga madaug ang gubat, apan mi-esplikar kini nga wala kanila ang baraha.
Gilekturan ni Vance si Zelenskyy nga kinahanglan mukalma ug magpasalamaton sa tabang nga gitanyag sa Amerika, ug likayan ang pagkomento nga walay nahimo ang ilang gobyerno sukad 2014.
Unang namahayag si Zelenskyy nga bisan sa naglabang nga Obama Administration hangtod sa kasamtangan, walay klaro nga ceasefire ang natuman tungod kay si Putin mismo ang mibuak sa kasabutan.
Gikastigo ni Trump ang pamahayag ni Zelenskyy ug miingon nga walay mahimong kasulbaran sa gubat sa duha ka nasud tungod sa kasuko ni Zelenskyy kang Putin.
Una niini, gitin-aw ni Trump nga wala siyay gidapigan sa duha ka presidente kay ang kalinaw ang iyang gusto ipatigbabaw sa tibuok kalibutan.
