CAGAYAN DE ORO CITY – Angayang ang liderato sa Philippine Army pinaagi sa 4th Infantry Division ang mangita’g lokasyon ug mga balay nga balhinan sa libuang residente nga apektado sa ipatuman nga demolasyon sa duha ka lote sulod sa Kampo Evangelista,Barangay Patag ning syudad sunod semana.
Kini ang reaksyon ni City Council Majority Leader Kagawad Atty. Edgar Cabanlas nunot sa nakaung-ong nga writ of demolition order implementation sa nahisgutang land claimants.
Miingon si Cabanlas nga trabaho unta kini sa Ph Army ug dili sa city government kay sila ang mopapahawa sa maong mga pamilya nga dugay na usab nakigbisog nga dili kini ipapahawa sa ilang gipuy-an nga mga puy-anan sa lugar.
Dugang ni Cabanlas nga wala kini matago nga suliran sa dakbayan rason nga unom ka higayon nang nasibog ang mando sa korte kay nangita pa sa pag-ayum-ayom alang sa mga apektadong mga pamilya.
Nasubo lang ang opisyal kay maglisod na’g hangyo si City Mayor Rolando ‘Klarex’ Uy sa korte nga masibog pa sa laing higayon ang demolition order kay nahatagan na sila sa gipangayong pabor sa miaging Abril ning tuiga.
Dumduman nga Abril 1 pa unta ipatuman ang demolasyon apan tungod sa hangyo nila ni Uy ingon man ni Misamis Oriental Provincial Gov. Pedro Unabia ug Cagayan de Oro 1st District Rep. Lordan Suan,nasibog kini sa Hunyo 17 ning tuiga.
Apan kay non-working holiday man ang maong petsa, gisibog kini sa petsa 18 rason nga subli na usab nagpatabang ang mga residente kabahin niini.
Hisayrang may giduso usab nga urgent motion to quash ang panig sa mga residente sa korte kay nalatid sa Supreme Court ruling sa maong kaso nga balik sa pagka-public domain ang giilogang yuta.
