CAGAYAN DE ORO CITY – Giwitkan sa kanhi alyado sa politika nga si Kag. Edgar Cabanlas nga mayoriyang lider sa 20th city council si kanhi City Mayor Oscar Moreno.
Kini human giingong nagkalisod pag-apas sa pagtibawas ang administrasyon ni City Mayor Rolando ‘Klarex’ Uy sa mga dagkong proyekto nga wala naapas sa katapusang termino ni Moreno sa tuig 2022.
‘Kung ensakto siya’g utok, wala niya dungana ang ospital sa Lumbia ug Tablon’, sulti ni Cabanlas sa interbyu ni media kaniya.
Siya miingon nga kung wala dungan-dungana ni Moreno ang katukuran sa hinapos nga bahin sa iyang termino,giingong dili unta magka-problema ang dakbayan.
Partikular nga gisampit sa konsehal ang nagbaton sa gindaghanon sa mga empleyado sa duha ka ospital nga lisod maapas masuwelduhan sa dakbayan.
Kini ang rason nga miakusar siya nga gihimo’g tuyo ni Moreno ang daghang dagkong mga proyekto sa patapos nga bahin sa iyang termino kay aron problemahon sa sunod nga administrasyon.
Si Klarex ug Oca ang dugay’ng panahon usab nga magka-alyado sa politika ug nahimong kaatbang nila ang bando sa Padayon Pilipino sa mga Emano ug pamilya Rodriguez.
Apan sa pagligid sa panahon, sila nagka-kontra diin alyado na sa mga Uy ang mga Rodriguez samtang naporma ang solido nga alyansa usab sa mga Emano ug mga Moreno sa syudad.
