CAGAYAN DE ORO CITY – Gihinaut ni Most Rev. Jose Cabantan,DD kinsa arsobispo sa Arkiyodiyoses sa Cagayan de Oro nga mituhop sa mga debotong Kristiyanismo ang mensahe nga gipaabot sa kahitas-an dihang nagpaubos sa pagpausa ug pagmalandong ang katawhan nunot sa semana santa.
Miingon si Cabantan nga kawang o pag-usik-usik lamang sa panahon ang pag-uban sa katawhan sa pagsaulog sa Easter Sunday o Domingo sa Pagkabanhaw kung wala nasabti niini ang kahulugan kung nganong nagpaubos sa kamatayon si Kristo-Hesus.
Gibutyag sa arsobispo nga dakong kahigayunan sa Kristohanong katilingban ang paglambigit sa mga mahal nga adlaw aron subli balikan kung unsay nag-unang tumong sa pagpakabuhi sa tawo ning kalibutan.
Bag-uhay pa nag-renew sa ilang bokasyon pagkapari ang mga kaparian nga sakop sa arkiyodiyoses sulod sa semana santa.
Dugtong usab niini,mihangyo ang kadagkuan sa simbahang Katoliko nga sila kanunay i-apil sa pag-ampo sa katawhan.
Kini tungod kay taliwala nga sila tinawag sa bokasyon sa pagka-pari apan anaa kanila ang kahuyang nga hinungdan nga makahimo’g kasaypanan ug kasal-anan.
Namahayag si Cabantan nga tungod sa ilang daghang kakulangon,mobati gihapon sila sa kahuyang ug kalaay samtang nagsunod sa kasuguan sa kahitas-an.
Kini ang rason nga nagkinahanglan kaayu sila sa suporta sa mga parokyano sa simabahan aron mas lig-on ang ilang pag-ampo nga sila kanunay’ng maglig-on sa kabubut-on sa Diyos.
