Gihan-ay na karon sa lokal nga kagamhanan sa Cagayan de Oro ang pagdawat sa kapin walo ka gatos (800) ka mga delegado alang sa gikatala nga 30th Vice Mayors’ League of the Philippines (VMLP) National Convention gikan Nobyembre 10 hangtod 13 sa dakbayan.
Gibutyag ni Mayor Rolando “Klarex” Uy atol sa Flag Raising Ceremony sa City Hall, nga usa ka dakong oportunidad ug kaangayan sa dakbayan nga kanunayng pilion nga dapit alang sa mga nasudnong panagtagbo sa mga opisyales sa kagamhanan.
Nanawagan usab ang mayor sa mga opisyales sa syudad sa pakig-usa ug paghatag og igong panahon sa pag-atiman ug pag-alagad sa mga bisita aron mapreserba ang dungog sa Cagayan de Oro isip “City of Golden Friendship”.
Ang maong dakong kombensyon pangulohan ni Vice Mayor Jocelyn “Bebot” Rodriguez kauban ang 21st City Council, nga magdala sa temang “One Legislature, One Digital Future” diin ilunsad usab ang eLegis Reference System aron mas mapakusog ang digital nga pagtinabangay sa mga lokal nga lehislatura sa tibuok nasud.
