CAGAYAN DE ORO CITY-Ipalagpot ni retired army general ug karon City Coun Romeo Calizo si Cogon Police Station commander C/Insp Gilbert Rollen.
Kini nunot sa pag-rido sa duha ka grupo sa Muslim-Maranao diin nagresulta sa kamatayon sa 3 ka tawo sa dihang nagpinusilay sa ukay-ukayan sa syudad sa miaging adlaw.
Miingon si Calizo kinsa chairman sa police,fire and public safety sa konseho nga pagpasagad ang gihimo Rollen hinungdan ipursigidi niini ang rekomendasyon nga paghulip kaniya sa puwesto.
Una nang gipusil-patay ang biktima nga si Mawi Batuintan sa gun for hire suspects apan sila namusilan-patay usab sa bodyguards atol sa ilang pagsibat sa Yacapin-Daumar Streets sa syudad sa miaging Domingo.
Samtang bisan si Cagayan de Oro City Police Office o COCPO spokesperson C/Insp Mardy Hortillosa II ang uyon nga angay ma-relib sa puwesto kadtong pipila ka station commanders nga dayag nagpasagad sa ilang trabaho.
Apan gibutyag ni Hortillosa nga mahimo usab nga inotil ang paningkamot sa usa ka kumander nga mamintinar ang kahusay’g kalinaw sa gidala niini nga police station kon kulang ang suporta nga makuha gikan sa katawhan.
Kumbinsido si Hortillosa nga may kakulangon si Cogon Police Station commander C/Insp Gilbert Rollen sa paghatag direktiba sa iyang mga sakop hinungdan nahitabo ang pinusilay-patay sa 3 ka Maranao Muslim ubos sa iyang area of responsibility sa miaging adlaw’ng Dominggo.
