CAGAYAN DE ORO CITY – Gibuhian na sa kapolisan ang cargo truck driver nga nalambigit sa dugu-ong aksidete sa national highway sa Barangay Tuk-on,Medina,Misamis Oriental.
Kini human nakakab-ot na sa amicable settlement ang panig sa tag-iya sa cargo truck ug ang liderato sa 26th Infantry Batallion nga ubos sa 4ID,Philippine Army.
Matud ni Medina Police Station commander Major Renante Labio nga gikan sa Agusan del Sur ang trak nga kargado sa mga kahoy’ng falcata nga gimaneho ni Junior Grepo,31 anyos samtang ang 6×6 truck nga gisakyan sa 27 ka sundalo ang gikan sa Bukidnon dihang natigayon ang dugu-ong aksidente.
Dugang ni Labio nga gilikayan sa army truck ang kargado nga cargo vehicle aron dili unta magbangga apan nasangit gihapon sila sa mga karga nga kahoy.
Kini ang rason nga dead on the spot si PFC John Llamonte, 29 anyos nga taga-Sta Irene ug CAA member Reneboy Mansapiay nga nagpuyo sa San Luis nga pulos nakabase sa Agusan del Sur.
Samtang samaron ug pabiling nagpaalim pa sa mga samad ang laing CAA member nga si John Mark Durango,24 anyos nga molopyo sa susamang probisya sa Caraga region.
Hisayrang nakab-ot ang panagsabot kay gipasalig sa agalon ni Grepo nga tubagon ang tanang mga obligasyon ngadto sa panig sa mga sundalo nunot sa aksidente sa miaging Sabado sa gabii.
