CAGAYAN DE ORO CITY – Giila ni kanhi City Mayor Oscar Moreno nga labing importante nga State of the Nation Address ang himoon ni Pres Bongbong Marcos sa Batasang Pambansa sa sunod semana.
Miingon si Morneo nga maoy gusto niya mahataga’g prioriod ni Marcos sa SONA ang klaro nga estado sa nasud ug mahimong direksyon niini taliwala sa mga pagsulay.
Siya miingon nga lauman niya nga tukion sa presidente ang hisgutanan sa ekonomiya,agrikultura ug bisan ang sektor sa edukasyon.
Samtang gusto ni Misamis Oriental 2nd District Rep.Bambi Emano nga matuki ni Marcos ang mga proyekto sa Duterte administration nga angayang ipadayon sa iyang pagdumala sa nasud sa unom ka tuig.
Miingon si Emano nga daghan ang mga maayong proyekto nga wala natiwas ni kanhi Pres Rodrigo Duterte ilabina ang pag-upgrade sa mga tugpahanan nga naglakip sa Laguindingan Airport dinhi sa lalawigan.
Siya miingon nga gidahom usab niini nga matutukan ni Marcos ang sektor sa agrikultura partikular ang pagtabang sa kinitaan sa mga mag-uuma ug mangingisda.
Samtang angayang ma-prioridad ni Marcos sa iyang hisgutan sa SONA ang job generation alang sa katawhan sa nasud.
Kini ang gihandom ni Citizens Watch for Good Governance convenor Atty Antonio Soriano sa gitakdang pagbatbat ni Marcos sa iyang SONA sunod semana.
Miingon si Soriano nga tungod sa pagkahagba sa ekonomiya sa nasud nga dala sa pandemya sa COVID-19,minilyong katawhan ang misamot paglisod kay nawad-an sa panginabuhian.
