CAGAYAN DE ORO CITY – Gipaubos ni City Mayor Rolando ‘Klarex’ Uy sa state of emergency ang dakbayan tungod sa pagka-apektahi sa kabarangayan sa distrito sa suplay sa panubig nga service area sa Cagayan de Oro Bulk Water Incorporated o COBI.
Nagsumikad ang mando ehekutibo sa mayor nunot sa gilugwa nga written communication sa kompanyang Metro Pacific Water pinaagi sa COBI nga nagpahibalo sa Rio Verde Water Consortium Incoporated nga mohunong una sila pag-suplay tubig sa Cagayan de Oro Water Districto o COWD kay pabiling wala mabayri ang sobra 479 milyones pesos nga payables.
Tungod niini,gilayong gilugwa ni Uy ang state of emergency order ug gihangyo ang konseho nga suportahan ang maong lakang pinaagi sa gitawag nga special session kagabii.
Una niini,gipabantayan sa city govt sa mga sundalo’g pulis ang bisinidad ni Rio Verde aron pugngan ang posibleng mga sabotahe sa bisan kinsa nga grupo samtang nag-atubang sa wala pa’y sulbad ang COWD-COBI contract dispute.
Dumduman nga tungod ning hitabua,giduot ni Mayor Klarex si kanhi City Mayor Oscar Moreno nga dunay dakong kalambigitan kon nganong nagka-problema ang kasamtangang BoDs ug mngt sa COWD sa nasudlan nga bulk water contract sa COBI.
Apan angay daw nga bayran sa COWD ang ilang standing payable obligation ngadto sa COBI.
Kini ang pagpa-konsensiya ni Konsehala Imee Moreno nunot sa nagka-grabeng kahimtang sa banging pinansyal sa COWD ug COBI nga mi-resulta na sa pagputol sa suplay sa tubig alang sa mga konsumante sa distrito uno ning syudad.
Namahayag ang batan -ong Moreno nga hangtod nga walay pagbayad nga mahitabo sa gisudlang kontrata tali sa duha ka panig,pabiling mag-atubang sa maong isyu ang dakbayan.
Daghang higayon nga nagkatagbo ang COWD ug COBI apan managsama nga dunay babag ang pagkab-ot nila sa win-win solution sa problema.
Samtang padayong naka-alerto ang Cagayan de Oro City Police Office ug Task Force Oro sa kasamtangang kahimtang sa panubig sa dakbayan.
Kini resulta sa hukom sa COBI nga paghunong na sa ilang pagbaligya’g tubig sa COWD gikan sa Rio Verde Water Consortium.
Miingon si COCPO spokesperson Police Lt Col. Evan Vinas nga 24/7 sila nga makatutok sa water treatment facility sa Rio Verde diin makita ang valve nga kontrolado usab sa COBI.
Namahayag si Vinas nga hangtod nga dili pa mahupay ang state of emergency tungod sa isyu sa tubig sa dakbayan,pabilin usab ang ilang puwersa makatutok sa government vital installations.
