CAGAYAN DE ORO CITY – Dili apektado apan gibarugan ni City Mayor Rolando ‘Klarex’ Uy ang padayong pagpatuman sa state of emergency sa kahimtang sa panubig sa unang distrito sa dakbayan.
Kini bisan kon nakadawat sa mga pagbatikos ug negatibong reaksyon sa nakab-ot nga hukom resulta sa pagbantay sa 24/7 sa mga sundalo’g pulis sa barbola o valve aron di palungon sa Rio Verde Water Consortium ang suplay-tubig alang sa Cagayan de Oro Water District o COWD.
Namahayag ang mayor nga dili niya igsapayan kon tamayon siya’g maayo masiguro lang nga kanunay dunay agas sa mga gripo sa kabalayan sa dakbayan.
Una nang nagka-kontrobersyal ang paghatag seguridad sa barbola sa water treatment facility kay giakusar sa Metro Pacific Water ug Cagayan de Oro Bulk Water Incorporated nga puwersado gisudlan sa mga pulis ug mga sundalo ang sulod nga bahin sa miaging petsa 1 sa Mayo.
Apan mismo si Uy ang misampit nga kutob lang daw sa ganghaan o gate sa Rio Verde ang nagbantay’ng mga sundalo’g pulis sukwahi sa pasangil saMetroPac ug bisan sa Local Water Utilities Administration o LWUA.
Apan sa nakuptang mga hulagway sa Bombo Radyo,makita nga misulod ang mga otoridad sa bisinidad sa Rio Verde ug mismong water treat facilities sukwahi sa depensa ni Uy.
Hisayrang una nang gikompirmar ni MetroPac Waters senior legal counsel Atty. Roberto Rodrigo nga putlan gyud unta nila sa Rio Verde management ang suplay sa tubig kay daghang palusot ang COWD aron dili lang makabayad sa gipaningil nga minilyong utang niini.
