CAGAYAN DE ORO CITY-Gikompirmar ni DSWD regional spokesperson Charmaigne Tadlas nga kabahin ang Cagayan de Oro City ug dakbayan sa Iligan nga ubos sa top 10 shame list sa tibuok nasud.
Kini human pabiling pakyas ang syudad nga ma-liquidate ang minilyong pondo nga gi-download sa DSWD alang sa social pension funds alang sa senior citizens dinhi sa rehiyon.
Gibutyag ni Tadlas nga wala kanila direkta naggikan sa ilang buhatan ang shamelist apan giingong nagsumikad sa Commission on Audit o COA aron mapugos ang local govt units pag-submit na sa ilang liquidation report alang ning tuiga.
Na-submitar na ni CSWD officer Teddy Sabugaa ang liquidation report kabahin sa pondo nga ilang nadawat ug nahatag sa senior citizens nga kabahin sa social pension fund gikan sa DSWD-10.
Gikompirmar ni Sabugaa nga mibisita kanila ang mga personahe sa DSWD-10 ug ilang gisayran nga dugay na sila naghatag sa ilang liquidation report kabahin niini.
Gani,nakurat lamang kini nga sobra kadako ang gipangita sa DSWD nga pondo nga angay niini nga hataga’g katin-awan.
