CAGAYAN DE ORO CITY – Giduaw ni Defense Secretary Gilberto Teodoro Jr kuyog ni Armed Forces of the Philippines chief of staff General Romeo Brawner Jr ang kanhi Lumbia Airport nga nagsilbi nang kabahin sa Enhance Defense Cooperation Agreement (EDCA) sa Brgy Lumbia sa syudad karong buntag.
Kini aron sutaon ang kahimtang sa mga pasilidad nga anaa sa kanhi tugpahanan nga magsilbi nang headquarters sa 15th Strike Wing sa Philippine Air Force.
Miingon si Teodoro nga dili tanang duluna sa maong kanhi tugpahanan nga gamiton isip EDCA site apan porsyon lang kay magsilbi usab kini nga joint command center sa Eastern Mindanao Command,Philippine Air Force ug Office of the Civil Defense.
Gipasabot ni Teodoro nga warehouse lang ang anaa sa EDCA diin makita ang kagamitan sa tropang Kano alang sa huminatarian assistance ug disaster response.
Padak-an usab ang rampa aron mas makaplastar ang kagamitan sa puwersang Amerikano nga dali na lang ang pagkuha sa mga suplay.
Kabahin usab sa tumong sa lokasyon nga magsilbing disaster relief operations sa Northern Mindanao alang sa mga taliabot nga pag-igo sa trahedya ug kalamidad nga epekto sa lihok sa kinaiyahan.
Gibutyag sa kalihim nga magsilbi usab kining training base sa 15th Strike Wing ug makapondo ang ilang mga kagamitan.
Hisayrang ang maong lokasyon ang usa sa siyam ka EDCA sites nga nagkatag sa Pilipinas.
