CAGAYAN DE ORO CITY – Prioridad sa city govt ang paghatag sa mga rota sa local transport groups ubos sa Local Public Transport Route Plan o LPTRP sa dakbayan.
Kini human gimando sa DOTr ang city hall nga magbaton niini subaysa omnibus franchising guidelines.
Miingon si committee on public utility chairman Kag. Romeo Calizo nga anaa pa sa 50 ka rota ang pasiunang buksan sa LTFRB sa transpor cooperatives sugod ning bulana.
Dugang sa konsehal nga gikinahanglan na nga magbaton na sa modernized public vehicles ang sama sa Cagayan de Oro isip highly urbanized city dinhi sa rehiyon.
Samtang sulatan ni National Confederation of Transport Union coordinator Joel Gabatan si City Mayor Rolando ‘Klarex’ Uy kabahin sa ilang kahingawa sa epekto sa ipatuman nga Local Public Transport Route Plan sa dakbayan sugod ning bulana.
Kini tungod kay nabalaka ang gagmay’ng transport groups nga mapadaplin sila kay mas mahataga’g prioridad ang dagkong grupo nga naporma na isip mga kooperatiba.
Siya miingon nga hangyu-on nila ang mayor nga kon mahimo malugwayan sa usa ka tuig nga dili sila ipatuman ang 71 ka mga rota kay magpatabang pa sila sa mo-finance kanila aron makaporma’g transport cooperatives.
