CAGAYAN DE ORO CITY – Walay laing tuyo ang kampo ni City Mayor Rolando ‘Klarex’ Uy apan pagpalayas sa kompanyang Metro Pacific Water aron ma-solo na sa ilang gipaboran nga water provider ang pag-suplay tubig dinhi sa syudad.
Kini ang gipamugos ni kanhi City Mayor Oscar Moreno dungan sa pag-ingon nga walay lig-ong basehan ang gideklara nga state of emergency ni Uy sa syudad.
Namahayag ang kanhi mayor nga bugtong motibo sa administrasyon nga sipaon ang MetroPac pinaagi sa Cagayan de Oro Bulk Water Incorporated aron direct water supplier na sa Cagayan de Oro Water District ang kompanyang Rio Verde Consortium Incorporated.
Miingon si Moreno nga lisud-lisuron sa city government ang COBI aron mapugos paghawa sa syudad ug balik-supplier sa tubig na sa COWD ang Rio Verde.
Dismayado usab kini nga daghan sa mga sakop sa local media sa syudad ang nagpagamit sa ‘dramatization’ sa city hall aron ihulagway nga tig-a ug walay balatian ang COBI.
Siya miingon nga ang deklarasyong state of emergency ang tipik sa eksena aron ipatoo sa katawhan nga gisalbar sa mayor ang taliabot nga krisis sa panubig sa dakbayan.
Apan bisan sa wala pa ang state of emergency order,daan nang namahayag si Uy nga interes sa katawhan ang gi-protektahan sa city government rason nga mihimo sila’g dinalian nga lakang.
Una nang dili kumbinsido si Uy nga walay kalabutan sa COWD-COBI contract si Moreno.
