CAGAYAN DE ORO CITY- Giakusahan karon sa grupo sa mga lumad ang kapolisan nga nang-haras kanila pinaagi sa pagsulod sa ilang mga pinuy-anan ug pagpangti-on sa mga armas sa kabataan diha sa Sitio Kala-Kala,Brgy Bagocboc,Opol,Misamis Oriental.
Kini human giingong pakyas ang CIDG-10 ug RPSP-10 pagpresentar sa search warrant aron sudlon ang ilang mga balay tungod sa pagduda nga nagbaton sa nagkadaiyang mga armas.
Gibutyag ni Bae Imelda Andam kinsa representante sa Indigenous People o IP nga nasupak sa kapolisan ang ilang tawhanong katungod atol sa hitabo.
Gibatikos usab nila ang usa ka giingong land squatter nga si Teddy Papeliera kinsa nagpataka’g tudlo ngadto sa mga balay sa mga lumad aron sudlon sa kapolisan.
Samtang lehitimo ug mando sa korte ang gibasehan sa CIDG-10 kuyog ang RPSB-10 sa pagronda sa mga pinuy-anan sa mga lumad diha sa Sitio Kala-Kala,Brgy Bagocboc,Opol,Misamis Oriental sa miaging gabii.
Gibutyag ni CIDG regional deputy operations head Supt Melgar Devaras nga mismo si RTC Branch 18 Presiding Executive Judge Dennis Alcantar ang nagpalugwa sa search warrant ug arrest warrants aron sikopon unta ang 10 ka suspected criminals nga nagpuyo sa maong dapit.
Gikompirmar usab ni Devaras nga gisikop nila si Papeliera paghuman sa operasyon tungod sa kasong giatubang niini sa korte dinhi sa syudad.
