Kinahanglan una nga mavalidate sa buhatan sa CLENRO ang pagsunod sa matag barangay sa mandato sa Republic Act 9003 o Ecological Solid Waste Management Act una pa sila makadawat sa incentive program sa siyudad.
Sumala ni CLENRO Manager Elvisa Mabilen, gisugo na nila ang Division of Solid Waste Management aron susihon kung tinuod nga naglihok ug functional ba ang mga material recovery facility (MRF) sa matag barangay.
Iyang gipasabot nga base sa waste analysis and characterization study, 25 porsyento lamang sa kinatibuk-ang basura ang angay ilabay isip residual waste ngadto sa sanitary landfill.
Kung adunay 1,000 kilos nga basura nga magikan sa barangay matag adlaw, 250 kilos lamang ang angay madala ngadto sa landfill samtang ang nahibilin kinahanglan ma-segregate ug ma-recycle.
Labaw pa niini, gipasabot sa CLENRO nga tumong sa programa nga mapamenosan ang basura nga madangat sa sanitary landfill aron mapalugwayan ang kinabuhi niini tungod kay mahal kaayo ang pagtukod ug pagdumala sa maong pasilidad.
Tungod niini, giaghat sa CLENRO ang mga barangay nga seryosohon ang waste segregation, recycling ug pagminus sa basura aron makab-ot ang tumong sa balaod ug mahimong kwalipikado sa insentibo sa siyudad.
