CAGAYA DE ORO CITY – Dili na suplaya’g tubig sa Cagayan de Oro Bulk Water Incorporated (COBI) ang Cagayan de Oro Water District (COWD) nga nagbaton sa libuang mga konsumante nga naglakip sa commercial establishments ning syudad.
Kini kon dili mabayran sa COWD ang standing financial obligations nga halos tunga-bilyones pesos na ngadto sa COBI subay sa pirmadong kontrata nga nalatid sa Bulk Water Supply Agreement o BWSA.
Sa gilugwa nga pahayag sa COBI senior legal officer nga si Atty. Roberto Rodrigo nga tungod sa kapakyasan sa COWD pagsanong sa obligasyon, apektado usab ang pinansyal nga tulubagon ngadto sa mga bangko ug sa ilang suppliers.
Pagpasabot ni Rodrigo nga gihatag na nila ang tanang pagsabot ug konsiderasyon sa COWD apan pabiling wala niini ang matubag ang maong obligasyon.
Dumduman nga tipik sa nalatid sa kontrata nga dunay otomatikong bulk water rate adjustments gikan Enero 2021,Disyembre 2023 ug Enero 2024 nga wala matuman sa COWD kay pabiling nagbayad sila gamit ang karaan nga kantidad sa kontrata.
Apan depensa usab sa COWD nga nalatid sa BWSA nga kon dunay trahedya o grabeng kalamidad nga maka-apektar sa aktuwal nga operasyon ug kinitaan,dili angay magpadayon ang pagpaningil.
Gitumbok sa COWD ang pag-igo sa COVID-19 pandemic nga miapektar sa tibuok kalibutan sa pila ka tuig.
Dugtong usab niini,dunay himoon nga aksyon ang city government aron makakab-ot sa ‘win-win solution’ ang duha ka panig ilabina nga nakataya ang interes sa katawhan sa dakbayan sa maong isyu.
