CAGAYAN DE ORO CITY – Gisaad sa kadagkuan sa Metro Pacific Waters nga pakigtagbuan ang Cagayan de Oro Water District o COWD ning semanaha.
Kini aron hiluton ang isyu nga putlan sa tubig-suplay ang COWD sa kadako sa utang.
Gihimo ni Atty. Roberto Rodrigo,senior legal counsel sa kompanya ang pahayag nunot sa laing pagtawag ni Kag. Edgar Cabanlas sa pagdungog sa committee of the whole kagahapong adlawa.
Miingon si Cabanlas nga dili kini ang kinaiya sa kadagkuan sa maong kompanya nga ilado sa pagtabang sa katawhang kabus sa nasud.Maoy gitumbok ni Cabanlas ang tag-iya ug pilantropo nga si Manny V. Pangilinan nga usa sa mga dakong negosyante sa nasud.
Samtang dili makiangayon nga putlon diha-diha sa COBI ang suplay sa panubig nga ilang gisuplay sa COWD sa syudad.
Miingon si kanhi COWD board of directors chairman Joel Baldelovar nga wala kini sa kontrata nga putlan sa suplay kon dili makabayad ang COWD.
Namahayag si Baldelovar nga maayo nga lingkuran kini sa duha ka panig aron dili ma-hostage ang katawhan sa dakbayan.
Apan miklaro si Baldelovar nga sukwahi sa gipamugos sa mga alyado ni City Mayor Rolando ‘Klarex’ Uy,nasunod ni Pangilinan ang usa sa tulo ka NEDA joint venture guidlines nga pagpalit sa tubig gikan sa kompanyang Rio Verde kay e-suplay sa COWD.
Mipahimutang usab sa water pipeline isip agianan sa tubig ni Rio Verde padulong COWD ang COBI itandi sa gipamugos nga walay kagamitan ang MetroPac sa ilang negosyo dinhi sa syudad.
