CAGAYAN DE ORO CITY – Wala ra’y 24 ka oras ug gilayong gipabalik ang suplay sa panubig sa service area sa Cagayan de Oro Water District -Cagayan de Oro Bulk Water Incorporated o COWD-COBI sa unang distrito sa syudad ug bisan porsyon sa lungsod sa Opol,Misamis Oriental.
Kini human nakakuha’g temporary restraining order o TRO ang COWD gikan sa sala ni Regional Trial Court Branch 17 Presiding Judge Ana Candida Casiño aron padayong magsuplay sa tubig ang COBI sa katawhan sa dakbayan.
Mismo si City Mayor Rolando ‘Klarex’ Uy ang nagkompirmar niini atol sa iyang pag-atubang sa media conference ning syudad kagabii.
Apan mubo lang ang kinabuhi sa maong TRO kay molungtad lang kini sa 72 oras gikan sa pagsilbi niini kagabii.
Samtang gitun-an sa mga alyado ni Uy ang pagduso’g class suit batok sa pagputol sa COBI sa suplay sa tubig alang sa mga konsumante sa COWD ning syudad.
Kini human tinud-a sa mngt sa COBI nga temporaryong ihunong ang pagbaligya’g tubig kang COWD samtang dili pa masulbad ang isyu nila sa bayrunon.
Miingon si Kag. Edgar Cabanlas nga maoy angayan mohimo’g aksyo niini kadagkuan sa COWD kay igo lang mihatag proteskyon sa interes sa katawhan ang pagsulod sa city govt sa maong isyu.
Dumduman nga pending pa ang resolusyon nga giduso ni Cabanlas aron ilhon nga persona non grata ang COBI dinhi sa syudad.
Sa pikas bahin,dili pugngan apan welcome alang sa MetroPac ug COBI kon mohimo’g dugang legal actions ang COWD batok sa pagputol sa suplay sa tubig sa distrito ning syudad.
Kini ang tubag ni Rodrigo sa maong kompanya sa panganti sa city govt gumikan sa nagka-grabe nga suliran tali sa COWD ug COBI.
Namahayag si Rodrigo nga wala pa sila mohimo’g kontra-legal actions sa ilang gidangatan dinhi sa syudad apan andam sila pagtubag kon kini taralon sa hukmanan.
