CAGAYAN DE ORO CITY – Gusto pa-imbestigaran sa pipila ka konsehal sa konseho ang giingong kakulangon sa kompanyang MetroPacific Water pinaagi sa Cagayan de Oro Bulk Water Incorporated o COBI sa syudad.
Kini human isulti ni Kag. James Judith nga pabiling wala mahupti sa COBI ang pipila ka ekipo nga magsilbing mosiguro nga luwas ang tubig nga magamit sa katawhan sa service area niini sa unang distrito sa syudad.
Namahayag si Judith angay mapanubag niini ang COBI nunot sa posibilidad nga dili diay luwas ang tubig nga gamiton sa katawhan nga ilang gi-suplay sa Cagayan de Oro Water District (COWD).
Gilayong gisita ni city council majority leader Kag. Edgar Cabanlas ang unod sa special report ni kabahin sa serbisyong panubig sa COBI ngadto sa city water district sa syudad.
Miingon si Cabanlas nga dili angayang magpasagad ang matag-konsehal sa ilang ipanulti sa hawanan sa konseho kay makahatag kini’g kalisang sa mga konsumante.
Hinoon,suportado sa veteran city councilor nga angay masusi kini sa mga komitiba sa franchise ug public utilities sa pagsiguro nga makatubag ang nalambigit nga mga partido sa isyu.
