CAGAYAN DE ORO CITY – Misaka ang kreminalidad apan giingong dili alarming bisan sa sunod-sunod nga dagkong dugu-ong panghitabo dinhi sa dakbayan.
Kini maoy assessment ni COCPO deputy director for operations Lt Col Surki Sereñas sa pipila ka pagpamusil-patay ug pagpanulis sa dakbayan sugod sa miaging tuig hangtod ning tuiga.
Miingon ang opisyal nga nakuratan lamang ang katawhan sa pipila ka hitabo gumikan sa ubos nga crime rate sulod sa duha ka tuig kay gipatuman man ang curfew hours tungod sa pandemya sa dakbayan.
Namugos si Sereñas pabiling kontrolado sa PNP ang kahimtang sa kahusay’g kalinaw sa dakbayan bisan sa pipila ka hitabo.
Kabahin sa wala pa’y kasulbaran ang mismong pagpusil-patay sa anak ni City Mayor Rolando ‘Klarex’ Uy nga si late Carmen Brgy Kag Tawee Uy,magsisibya nga si Federico ‘Ding’ Gempesaw,pagpanulis sa gasoline station sa Brgy Puerto ug bodega sa bugasan sa Zayas,Brgy Carmen sa dakbayan.
Dugang ni Sereñas nga walay basehan ang akusasyon nga may pagsaka sa kreminalidad partikular sa dakbayan kay nahulipan na sa katungdanan si kanhi Pres. Rodrigo Duterte sa bag-ong Marcos administrasyon.
Kini maoy reaksyon ni Sereñas kabahin sa maong panaghap nunot usab sa pipila ka dagkong kremin sa syudad.
Miingon si Sereñas nga naglihok ang kapolisan sa dakbayan ug ubos lang gani ang crime index niini itandi sa ubang mga dagkong lugar dinhi sa nasud.
