CAGAYAN DE ORO CITY – Dili basehan sa eleksyon ang giatubang nga impeachment complaint ni Vice Pres Sara Duterte apan kon unsa ang daghang nabuhat sa mga kongresista sa kada-distrito diin sila nag-representar sa kamarabaha.
Kini ang tubag ni Misamis Oriental 2nd District Cong. Bambi Emano sa pangutana kon dili ba siya apektado sa mga pagbatikos nga sagad naggikan sa social media kay kabahin sa mi-endorso sa impeachment batok VP Sara sa senado.
Miingon ang kongresista nga mabalaka lamang ang usa ka magbabalaod nga dili botaran sa Mayo 12 nga eleksyon kon kini walay nahimo ngadto sa iyang katawhan diin iyang gi-presentahan.
Siya miingon nga gi-konsiderar niya nga katungod sa matag-usa ang pagbatikos,pagbiay-biay,panghimaraot ug uban pa sa ngalan sa demokrasya rason nga nasabtan niya ang sentimiento sa katawhan.
Gani,gihimo niya nga pananglitan ang gidangatan ni kanhi City Mayor Oscar Moreno nga tipik sa nagtaral kang former Pres. Joseph Estrada sa giatubang nga impeachment kaniadto diin nahiagom usab sa grabeng batikos.
Apan nahimo niya kini nga tinubdan sa kusog kay taliwala sa mga pagsaway nga nadawat ni Moreno kay sobra kasikat si Erap nga gipalagpot sa katungdanan pero naghimo na hinoon kaniya nga gobernador sa lalawigan ug mayor sa dakbayan sa daghang katuigan.
Kini ang rason nga gisulti ni Emano nga dili siya apektado sa mga pagsaway kay alang kaniya,gihimo lang niini ang ensaktong hukom nga alang sa gidala niya nga distrito.
Una nang mipalag ang magbabalaod sa pasangil nga mipirma sila sa impeachment kay adunay bugting minilyong salapi gikan sa liderato sa kamarabaha.
Hisayrang duha ka district offices ang gipahiluna sa segundo distrito aron mapasayon ang pagdalikyat ug pag-atiman sa mga tawo nga mangayo’g tabang sa buhatan sa kongresista.
