CAGAYAN DE ORO CITY – Nagkadako ang posibilidad nga madid-an makadagan pagka-kongresista si Carmen Punong Brgy Kikang Uy batok incumbent Cagayan de Oro 1st District Cong. Lordan Suan sa distrito uno ning syudad sa 2025 elections.
Kini kon madutlan sa giduso nga disqualification case sa Commission on Elections -Law Dept tungod sa giingong pipila ka kahiwian nga nadiskobre sa fact finding atol sa pagpang-rehistro sa mga botante sa milabay’ng mga bulan.
Nalatid sa maong reklamo nga tinuyo ug malisyoso ang gihimong pag-isyo ni Kapitan Uy sa brgy certifications diin anaa sa 8-mil ka bag-ong botante ang naka-benepisyo niini.
Kini ang rason nga unang gimando ni Comelec chairman George Garcia nga imbestigaran sa Comelec 10 ang maong isyu ayha nalugwa ang kopya sa disqualification case batok kang Uy.
Nagsumikad ang gisabugang nga isyu sa maong brgy kapitan nunot usab sa reklamo sa kampo ni Suan sa grabeng pagdagsa sa mga botante nga tuyo magpa-rehistro sa Brgy Carmen ning syudad.
Hisayrang si Suan ug Kikang ang una nang nagka-engkuwentro sa pagka-kongresista ug laraw na usab nila kini nga himoon sa maong distrito sunod tuig nga piliay.
