CAGAYAN DE ORO CITY – Nagpabiling labing paspas nga tinubdan sa mga masaligang impormasyon ang radyo taliwala sa pagpatim-aw sa social media sa moderno nang panahon.
Kini ang assesment sa radio veteran anchor ug kanhi Cagayan de Oro Press Club Pres. Frank Mendez alayon sa pagsaulog sa World Radio Day ning adlawa.
Namahayag si Mendez nga mas disiplinado ug dunay gisubay nga code of ethics aron responsable ang anaa sa mainstream media itandi sa video blogging ug content creators.
Dugang ni Mendez nga mga balita gikan sa radyo pa gyud gihapon ang makaabot sa kabukiran o mga lugar nga walay signal kay dili masudlan sa koneksyon sa internet.
Samtang bisan si veteran journalist ug karon COPC Pres. Froilan Gallardo kumbinsido sa gahom o impluwensiya nga dala sa radyo nga misulod na sa social media sama sa gihimo nga inobasyon sa Bombo Radyo Philippines.
Namahayag si Gallardo nga anaa na sa radyo ang dakong porsiento sa mga tawo nga naminaw epekto sa tulo ka aspeto nga hawid niini.
Siya miingon nga tungod sa kabag-uhan sa teknolohiya,mihinay ang readership sa newspapers rason nga sila misulod usab sa internet.
Dugtong niini,prioridad sa liderato sa COPC nga ipaubos sa dugang trainings ang bag-ong mainstream media reporters aron dunay ensaktong abilidad mangutana sa mga komplikado ug kontrobersyal nga mga isyu sa katilingban.
