CAGAGYAN DE ORO CITY – Giaghat ni kanhi City Councilor Eric Salcedo ang mga konsumante nga mohimo’g lihok-protesta nunot sa alanganin nga kahimtang sa panubig sa dakbayan.
Kini human bahari sa makaduhang higayon sa Cagayan de Oro Bulk Water Incorporated o COBI ang COWD nga putla’g suplay kon dili makabayad sa halos tunga sa bilyon ka pesos nga utang.
Miingon si Salcedo kinsa alyado ni City Mayor Rolando ‘Klarex’ Uy nga tungod sa pagpasagad ni kanhi City Mayor Oscar Moreno nahimong hostage consumers ang katawhan sa pahutak nga pagpaningil sa COBI sa bayrunon sa tubig sa dakbayan.
Gihagit ni Salcedo ang COWD nga mangayo’g temporary restraining order sa korte batok sa COBI aron dili sila masaypan nga daw ka-konsabo ni Moreno.
Samtang nangandam na ang COWD nga dili dako’g epekto sa katawhan kon ihinayon sa COBI ang ilang bahad nga moundang pagsuplay sa panubig.
Gibutyag ni COWD General Manager Engr. Antonio Young nga tipik usab sa ilang kab-uton nga lakang ang pagdangop sa korte aron mangayo’g TRO kon moabot sa punto nga ihikaw sa COBI ang serbisyong panubig.
Una nang nabulgar giakusar sa city council nga nagsilbi lang ‘middle man’ ang COBI kay ang tinud-anay nga dunay transkasyon mao ang Rio Verde ug Metro Pac diin tigpalitan lang si COWD sa processed water gikan sa natural source niini nga mao ang suba.
Sa pikas bahin,gipahinay-hinay sa pipila ka miembro sa konseho ang ilang mga kauban kabahin sa ipatuman nga lakang kon tinud-on sa MetroPac-COBI nga dili na suplayan sa tubig ang katawhan.
Kini human unang gibutyag ni Kag. Edgar Cabanlas nga iyang isugyot sa mayor nga ipaubos sa water state of emergency ang syudad aron e-taker over una sa mga sundalo’g pulis ang operasyon sa COWD.
Miingon si Kag. Ian Mark Nacaya nga angayang mangita’g laing sulbad ug likayan nga mapun-an lamang ang komplikasyon.
