CAGAYAN DE ORO CITY – Magtagbo ning adlawa sila City Vice Mayor Jocelyn ‘Bebot’ Rodriguez ug mga konsehales alayon sa pagsugod na’g tuki sa gisudlang mga kontrata sa panubig tali sa COWD ingon man sa Metro Pacific Water Consoritum ning syudad.
Kini aron tun-an ug sabton ang kahimtang sa water contracts sa duha ka panig nga nag-resulta sa disbintaha sa interes sa katawhan sa dakbayan.
Miingon si public utilities committee chairman Kag. Romeo Calizo nga maoy gusto ni City Mayor Rolando ‘Klarex’ Uy nga malamdagan ang city govt kabahin sa kahimtang sa panubig sa dakbayan diin naglisod na pag-sustiner sa serbisyo ang COWD tungod sa kadako na sa obligasyon niini sa MetroPac pinaagi sa Cagayan de Oro Bulk Water Incorporated o COBI.
Samtang nagpanikad usab ang mga konsehal nga matuki ang kontrobersyal nga water contracts tali sa COWD ug kompanyang Metro Pacific atol adhoc committee meeting sa konseho karong buntag.
Miingon si committee on public utilities vice chairman Kag. Roger Abaday nga inisyal nila nga nasuta kon tinood ba nga apil ang Rio Verde sa kasamtangang naka-kontrata ngadto sa COWD apan nag-interes gihapon pag-suplay sa panubig sa ubang bahin sa dakbayan.
Nagduda si Abaday nga giluto sa kaugalingong mantika ang mga taga- Cagayan de Oro sa sistemang panubig rason nga dunay pagsusi niini sa konseho.
Samtang uyon si kanhi Kag. Reuben Daba nga ipaubos sa Public Private Partnership o PPP scheme ang sistemang panubig dinhi sa syudad.
Kini aron maabagan ang COWD sa ilang nagkalisod nga operasyon epekto sa ubos nga kinitaan apan dako’g panginahanglan sa maintenance niini.
Miingon si Daba kinsa tipik sa mi-kuwestiyon kaniadto sa pagsulod sa MetroPac a syudad nga dili angayang itugyan sa pribadong pagdumala ang nag-una nga panginahanglan sa katawhan sama sa panubig.
Una niini,nalakbitan kaniadto ni Uy nga ipaubos na lang sa PPP ang COWD aron mobalik ang maayo nga serbisyo ngadto sa mga konsumante sa dakbayan.
