CAGAYAN DE ORO CITY – Naglugwa sa ikaduhang higayon ang Cagayan de Oro Bulk Water Incorporated o COBI sa ilang suwat-demanda sa katawhan pinaagi sa Cagayan de Oro Water District o COWD nga putla’g suplay sa tubig kon dili makabayad sa sobra 400 milyones pesos nga obligasyon.
Wala kini gikalipay ni City Mayor Rolando ‘Klarex’ Uy nga bahad sa COBI rason gimando niini ang pag-rebyo sa 30 ka tuig nga kontrata nga gisudlan sa COWD ug COBI sa tuig 2017.
Miingon ang mayor nga naglugwa usab kini’g mando sa technical working group nga iyang gitukod aron tabangan nila sa konseho ang pagsalbad sa sistemang panubig sa dakbayan.
Samtang magtagbo ang naglangkob sa konseho nunot sa bahad sa COBI nga putlan sa suplay sa panubig ang COWD kon mapakyas pagbayad sa halos tunga sa milyon ka pesos nga obligasyon sulod sa 30 ka adlaw.
Miingon si committee of the whole chairman Kag. Edgar Cabanlas importante kini nga bahin sa panagtagbo kay ipatawag niini ang tanang nalambigit nga opisina sa gobierno aron makaporma sa lakang sa bahad sa COBI.
Una nang naalarma si public utilities committee chairman Kag. Romeo Calizo sa hulga sa COBI rason nga dunay hiniusang lakang nga buhaton ang dakbayan batok niini.
